DESCRICIÓN:
Especie moi común que pode verse en terreos cultivados, bordes de camiños, muros ou terreos alterados.
Etimoloxía:
*Sonchus: Do grego sónkhos, sónkos ou do latín sonchus, soncos, sonchos, nome que en Teofrasto, Dioscórides e Plinio se lle dá a unha planta espiñenta comestible:
- En Teofrasto fálase dunha planta de follas espiñentas que, cando se secan, vólvense brandas e non pican, cunha raíz comestible, carnosa e alongada, e con capítulos florais baixos ao secarse.
- Dioscórides menciona unha planta silvestre e espiñenta, e outra delicada e comestible. Descríbeas con talo anguloso, oco e con follas fendidas.
- Plinio diferencia dous tipos, branco e negro, e di que se parecerían á leituga se non fosen espiñentas, e que o talo ao quebrar bota leite.
Os autores do renacemento identificaron aos sónkhos de Dioscórides con especies de serralla, ás que Matthioli chamaba S. aspera (serralla áspera) e S. laevis (serralla lisa), ao parecer os actuais S. asper (L.) Hill e S. oleraceus L., e chamáronlle tamén Sonchus a diversas plantas máis ou menos parecidas. Caspar Bauhin adoptaba na Pinax de 1623 ese nome como denominación xenérica das serrallas e plantas similares, incluíndo a Urospermum picroides (L.) Scop. e F.W. Schmidt, Reichardia picroides (L.) Roth, etc. E o mesmo fixeron logo, pero nun sentido máis restrinxido, Tournefort e Linneo. Sibthorp & Smith na Florae Graecae prodromus, onde identificaron as plantas de Dioscórides como S. arvensis L. e S. oleraceus L. Sen embargo, Sprengel opinaba que a máis espiñenta debería ser rompesaias, Helminthotheca echioides (L.) Holub, planta espiñenta que tamén se consume como verdura. A etimoloxía de sónkhos descoñécese. Sébastien Vaillant creu sen fundamento que podería derivar do grego somphós: esponxoso, poroso, valeiro, en alusión aos talos tenros e ocos. Ese nome foi adoptado por Tournefort en 1694 e 1700 para uns do seus xéneros, e logo por Linneo a partir de 1735.
*Oleraceus: epíteto latino derivado de olus, que significa vexetal ou vexetal, facendo referencia a que é unha planta forraxeira que serve de alimento.