Saramago

DESCRICIÓN:

Esta sería a subespecie raphanistrum, especie de rábano silvestre que non ten a raíz engrosada.

Pode verse en toda Galicia e medra como ruderal e arvense: en terreos abandonados, como herba non desexada nos cultivos, beiras de camiños, ...

Tamén pode atoparse a subespecie landra, que ten un porte máis vigoroso e a raíz engrosada e que pode diferenciarse ademais polos froitos. Estes son como unha especie de vaina chamada silicua, que ten varios segmentos ou número de sementes. Na subespecie raphanistrum ten ata 15, fronte a 1-5 da landra. Tamén son máis estreitos, 1'5-4 mm de ancho (raphanistrum) e 4-8 mm (landra).

Coma todas as especies crucíferas (Brassicaceae) ten 4 pétalos en cruz, normalmente son amarelos, aínda que poden tirar a branco ou a rosado.

Raphanus: do grego ῥάφᾰνος ráphanos (rábano picante, rabanete), de ῥα rha (contracción), de ῥίζα rhiza e de φαίνω phaíno (con raíces visibles).

Raphanistrum: despectivo do xénero Raphanus, por ser silvestre.